လေတက်ရင် လေဖြတ်နိင်လား

လေတက်ရင် လေဖြတ်နိုင်သလား။ နှိပ်တာနဲ့ လေတတ်တာ ဘယ်လိုဆက်စပ်မှုရှိလဲ။ မေးခွန်းက အမေးများတယ်။ သက်ကြီးရွယ်အိုလူနာတွေ မကြာခဏမေးတတ်တဲ့မေးခွန်းမျိုးပါ။ ကိုယ့်မိသားစုမှာ သက်ကြီးရွယ်အိုတွေရှိရင် သတိထားမိမယ်။ တနေရာရာကို နှိပ်လိုက်တိုင်း တဂေ့ဂေ့နဲ့ လေထွက်တာမျိုး။ ဘေးလူတွေအတွက်တော့  စိတ်ပျက်စရာကြီးပေါ့။မသိရင် တမင်တကာလုပ်နေတယ်ထင်ရအောင်က်ို လေတက်ကြတာလား။ ဒီလိုလေတက်တာ ရောဂါလား၊ဘာဖြစ်တာလဲ ဘာ့ကြောင့်လဲ၊စိုးရိမ်ရလား သိချင်ကြမှာပဲ။ အဲဒီတော့ ဆရာဝန်တွေကို မေးကြတယ်။ ဘာ့ကြောင့် ဖြစ်ရလဲ။ဆေးပညာက တိုးတက်နေပြီဆိုပေမယ့် ဇီဝကမ္မပြောငိးလဲမှု၊သက်ရောက်မှုတွေ မသိတာ၊နားမလည်သေးတာတွေ အများကြီးရှိနေပါသေးတယ်။ အနောက်တိုင်းဆရာက အနောက်တိုင်းဆန်ဆန်၊တိုင်းရင်းဆေးဆရာက တိုင်းရင်းဆေးပညာအလိုအရ ပြောပါလိမ့်မယ်။

ပုံမှန်အားဖြင့် ဗိုက်ထဲမှာ လေတွေပြည့်နေတဲ့အခါ လေထွက်တာ၊လေတက်တာရှိတယ်။ ဂတ်စ်ပါတဲ့အချိုရည်၊ဟင်းရည်ပူပူသောက်တဲ့ စုပ်တဲ့အခါ လေတွေအများကြီး အစားအသောက်နဲ့အတူ ဗိုက်ထဲဝင်သွားတယ် ဟုတ်ပါတယ်။ ဒါပေမယ့် အဲလိုဝင်သွားတဲ့လေမျိုးက စားပြီးမကြာဘူး။ ချက်ချင်းတန်းထွက်ပါတယ်။ နာရီဝက်အတွင်း ဝင်သွားတဲ့လေတွေ ပြန်ထွက်သွားလိမ့်မယ်။ အစာအိမ်ထဲမှာလေတွေပြည့်နေလို့ အပေါ် ပြန်ထွက်တာရှင်းတယ်။ အူထဲရောက်တဲ့လေကျတော့ အထက်ကမထွက်တော့ဘူး။ အောက်ကနေပြန်ထွက်တယ်။ ဒါက အူလမ်းကြောင်းက လေထွက်တဲ့ အခြေခံသီအိုရီဖြစ်ပါတယ်။ 

လူ့ခန္ဓာကိုယ်မှာ လေဝင်ပြီး ထွက်တဲ့နေရာသုံးနေရာ ရှိတယ်။တခုကပါးစပ်။ စားသောက်တဲ့အခါ ဝင်လာတဲ့လေက အစာအိမ်နဲ့အူလမ်းကြောင်းရောက်တယ်။ ဝင်ပြီးတာနဲ့ အပေါ်(သို့)အောက်အပေါက်က ထွက်လိမ့်မယ်။ နောက်နေရာတခုက အဆုတ်ဖြစ်ပါတယ်။ လေကိုရှုသွင်းတဲ့အခါ နှာခေါင်းကတဆင့်လေပြွန်ထဲရောက် နောက်ဆုံးအဆုတ်မှာ ရှိတဲ့လေအိတ်(alveoli)ထဲ ဝင်ရောက်တယ်။ ဝင်သွားတဲ့လေကအောက်စီဂျင်ဖြစ်ပေမယ့် ပြန်ထွက်တဲ့လေကျတော့ ကာဗွန်ဒိုင်အောက်ဆိုက်ဖြစ်တယ်။ နောက်ဆုံးလေဝင်တဲ့ နေရာတခုက နားဖြစ်ပါတယ်။ နားဆိုတာ လေဝင်လေထွက်ဖို့ သဘာဝကပေးထားတဲ့ ပြတင်းပေါက်နဲ့ တင်စားကြတယ်။ လေထုဖိအားပြောင်းလဲမှုကို သူက ခံစားနိုင်တယ်။ တောင်တက်တောင်ဆင်း ကားစီး၊လေယာဉ်စီးတဲ့အခါမျိုးမှာ နားအူတာ၊ခေါင်းမူးတာတွေ ခံစားရတယ်။ အိမ်ပတ်ပြေးတဲ့အခါ ချာချာလည်မူးရင်လည်း အတူတူပဲ။ နားအတွင်းပိုင်းမှာ လေထုဖိအား ရုတ်တရက် ပြောင်းလဲမှုကြောင့် ဖြစ်ပါတယ်။  

ဒါပေမယ့် အခုဟာက စားပြီသောက်ပြီးလို့ ထွက်တဲ့လေမျိုး မဟုတ်ဘူး။ ခန္ဓာကိုယ်တနေရာရာ(ကုတ်၊ကျောပြင်၊ခြေထောက်)စတဲ့နေရာတွေကို နှိပ်လိုက်တိုင်း လေထွက်တာဖြစ်တယ်။ တမျိုးပြောရရင် အကြောတခုခုကို ထိလိုက်တိုင်း ခန္ဓာကိုယ်က ပြန်တုံ့ပြန်တဲ့သဘောမျိုးပါ။ ဘာမှ မထိရင်တော့ ဘာမှမဖြစ်ပါဘူး။ အများစုက အသက်(၆၀)ကျော် အဖိုး၊အဖွားအရွယ် တွေမှာ ဖြစ်တယ်။  ဇရာလက္ခဏာဆိုရင် မှန်သလိုလိုရှိပေမယ့် ကလေးတွေလည်း ရိ်ှပါတယ်။ ရှားတော့ရှားတာပေါ့။ ဒီလိုဖြစ်ကြတော့ လူ့သဘော ရောဂါများလားဆိုပြီး သွေးစစ်၊ဆီးစစ်၊ဓာတ်မှန်ရိုက်ကြတယ်။ အများစုက အကုန်ကောင်းပါတယ်။ ရောဂါကြောငိ့ မဟုတ်ရင်ဘာကြောင့်များလဲ တွေးစရာရှိလာပါပြီ။ 

ဘာ့ကြောင့် ဒီလိုဖြစ်ရလဲ

ဆေးကျောင်းသားတိုင်း ဒုတိယနှစ်ရောက်ရင် ခန္ဓာဗေဒ၊ဇီဝကမ္မနဲ့ ဇီဝဓာတုဆိုပြီး သင်ရပါတယ်။ ဇီဝကမ္မဆိုတာ ကိုယ်ခန္ဓာဇီဝဖြစ်စဉ်ပြောင်းလဲခြင်းကို လေ့လာရတာဖြစ်တယ်။ လူ့ခန္ဓာကိုယ်မှာ သိစိတ်မဲ့ အာရုံကြောလှုပ်ရှားမှုကို ဖြစ်စေတဲ့ စနစ်တွေထဲမှာ parasympatheticဆိုတဲ့ စနစ်တခု ရှိပါတယ်။ လူတယောက် အနားယူတဲ့အချိန်မှာ ဖြစ်ပေါ်တဲ့ ဇီဝပြောင်းလဲမှုကို ဒီစနစ်က ထိန်းချုပ်ပေးတယ်။ ဥပမာအားဖြင့် ကျွန်တော်တို့စိတ်ကမသိဘဲ အသက်ရှုနေတာ သူ့ကျေးဇူးပါ။ ထမင်းစားပြီး ထိုင်နေပေမယ့် ဗိုက်ထဲက အစာအိမ်လှုပ်ရှားအောင်၊အစားအစာ ချေဖျက်အောင် ဒီစနစ်က သူ့ဘာသာလုပ်ဆောင်ပေးနေတယ်။ ဒီစနစ်ကို ထိန်းချုပ်ပေးတဲ့ အာရုံခံဆဲလ်တွေက ဦးနှောက်နဲ့ ကျောရိုးဆစ်မကြီးက ထွက်လာတယ်။ အထူးသဖြင့် အပေါ်ဆုံး ဦးနှောက်ကထွက်လာတဲ့ cranial nerveနဲ့ အောက်ဆုံး မြှီးညောင့်ရိုးဆစ်ကထွက်လာတဲ့ sacral nerveက တွေက parasympathetic ပြောင်းလဲမှုကို ထိန်းချုပ်ပေးတယ်။ အဲဒီထဲမှာမှ ဦးနှောက်က ထွက်လာတဲ့ vagus nerve ဆိုတာ ခန္ဓာကိုယ်အတွက် အခရာကျတယ်။ သူ့ရဲ့ တာဝန်တွေက မသေးပါဘူး။ နှလုံးခုန်တာ၊အစာခြေတာ၊ချွေးထွက်တာ စတဲ့သိစိတ်မဲ့တုံ့ပြန်မှု မှန်သမျှကို ထ်ိန်းချုပ်ပေးတယ်။ လည်ချောင်း၊လည်မြိုမှာရှိတဲ့ ကြွက်သားတွေရဲ့ လှုပ်ရှားမှုကို ဖြစ်ပေါ်စေတာကြောင့် အသံထွက်တာ၊အသက်ရှုတာစတဲ့ဖြစ်စဉ်တွေပေါ် သက်ရောက်စေသတဲ့။ 

လူ့ခန္ဓာကိုယ်ကို နှိပ်တဲ့အခါ vagus nerveကို သွားရောက်လှုံ့ဆော်လို့ လည်ပင်းကြွက်သား၊အစာမြိုပြွန်တွေ သိစိတ်မဲ့လှုပ်ရှားလာပါတယ်။ အဲလို လှုပ်ရှားမှုတွေကနေ အသံတွေထွက်လာတယ်။ ဒါ့ကြောင့် ခန္ဓာကိုယ်ကို နှိပ်တဲ့အခါ တဂေ့ဂေ့နဲ့ လေထွက်တာ vagus nerveကြောင့်ပါ။ နှိပ်တဲ့အခါ သွေးကြော(မြန်မာလို လေကြောခေါ်မလား)ကို ဖိမိတဲ့အခါ သွေးလည်ပတ်မှုအားကောင်းလာတယ်။ ဒီလိုနည်းနဲ့ skeletal muscle ကြွက်သားတွေ ပြေလျှော့လာပြီး အကြောအခြင်တွေ၊အညောင်းအညာတွေ သက်သာစေတယ်။ အညောင်းအညာ ပြေပျောက်သွားပြီး နေလို့ထိုင်လို့ ပိုကောင်းလာတယ်။ လူနာကတော့ နှိပ်လိုက်လို့ လေတက်၊လေတက်လို့ အနေရခက်တာတွေ သက်သာသွားတယ်လို့ ထင်ပါတယ်။ ဒါ့ကြောင့် နှိပ်လိုက်တိုင်း လေတက်တာ စိုးရိမ်စရာမဟုတိပါဘူး။ ရောဂါလည်းမဟုတ်ပါဘူး။ တချို့တွေးသလို လေဖြတ်တာမျိုးလည်း မဖြစ်နိုင်ဘူး။ ဒီတပတ်အတွက် လေဖြတ်တာနဲ့ လေတက်တာ ဘာမှမဆိုင်တဲ့အကြောင်း ပြောကြားရင်း နိဂုံးချုပ်အပ်ပါတယ်။ 

ဒေါက်တာ အေးမင်းထူး

ရတနာပုံသတင်းစာ(၂၉.၁၂.၁၄)