အစာစားပြီး ဘာကြောင့်လေတက်လဲ

ဆရာ

နောက်ထပ်သိချင်တာလေး ထပ်ပြီးမေးခွင့်ပြုပါ။ အရင်ကမေးခဲ့တာတွေကို စိတ်ရှည်လက်ရှည်ဖြေကြားပေးတာတွေ အတွက်လဲ ကျေးဇူးအများကြီးတင်ပါတယ် ရှင့်။ နောက်ထပ်သိချင်တာက လေတက်တာ ဘာကြောင့်လဲဆရာ နန်းဆိုလိုတာက ထမင်းစားပြီးလေတက်တာကိုပြောတာမဟုတ်ပါဘူး။ နန်းတို့ငယ်ငယ်က နန်းတို့ဖွားဖွားကို နှိပ်ပေးရင် ဖွားဖွားက တဂေ့ ဂေ့ နဲ့ လေတွေတက်တယ်လေ။ နှိပ်တာနဲ့ လေတက်တာနဲ့ ဘယ်လိုပတ်သက်လဲဆရာ။ ခု နန်းကိုလဲ ဘယ်နေရာကိုနှိပ် နှိပ် တဂေ့ ဂေ့ နဲ့ လေတွေတက်တယ်ဆရာ။ လက်ဆစ်၊ ခြေဆစ်လေးတွေကိုပဲ နှိပ် နှိပ်။ နောက်ဆုံး ခေါင်းလျှော်ချိန် မျက်နှာသစ်ချိန်တွေမှာ ခေါင်းတွေ မျက်နှာတွေကို နှိပ်နယ်ရင်တောင်မှ တဂေ့ ဂေ့ နဲ့ လေတက်တယ်။ ညောင်းနေတဲ့နေရာကို နှိပ်မိရင် ပိုပြီးတော့
လေတက်တယ်ဆရာ။ အဲ့နေရာကိုနှိပ်လို့လေတက်ရင် အဲ့နေရာမှာဆက်နှိပ်နေပြီး လေတတ်တာရပ်သွားပြီဆိုရင်တော့ ညောင်းနေတာလဲ သက်သာသွားတယ်။ နောက်ပြီး ဗိုက်ဆာရင်လဲ လေတတ်တယ်နော်ဆရာ။ ဗိုက်ဆာလို့လေတက်တာ၊ ထမင်းစားပြီးလို့လေတက်တာနဲ့ နှိပ်လို့လေတက်တာတွေဟာ အတူတူပဲလားဆရာ။ တချို့စာတွေထဲမှာ ဖတ်ဖူးတာက လေတွေမျိုချမိလို့၊ ပီကေဝါးလို့တဲ့ နန်းပီကေမဝါးပါဘူး။ လေတွေမျိုချမိတာတော့ ဟင်းရည်ပူပူသောက်တဲ့အချိန်တို့ ရေနွေးသောက်တဲ့အချိန်တို့ဆို လေတွေပါသွားမယ်ထင်တယ်နော်။ အဲ့လိုလေတက်တာ ဘာကြောင့်လဲ။ ဘာဖြစ်တတ်လဲဆရာ။ အမျိုးသားက ဘယ်နေရာနှိပ်နှိပ် လေတွေထွက်လာတာ လေတွေဘာတွေဖြတ်တတ်မလားမသိဘူးလို့ စ သလို နောက်သလိုနဲ့ ပြောတယ်။ အဲ့လိုလေဖြတ်တာတွေဘာတွေရော ဖြစ်တတ်သလားဆရာ။ နှိပ်တဲ့အချိန်တွေတိုင်း တဂေ့ ဂေ့ နဲ့ လေတွေတက်နေတော့ (လေတက်ပြီးရင် ညောင်းပြေသွားပေမဲ့) လေတက်ရတာ (မျက်နှာကြီးရှုံ့မဲ့ပြီးတော့) ပင်ပမ်းသလိုပဲခံစားရတယ်။ ရှက်လဲ ရှက်တယ်။ အောင့်ထားလို့လဲမရဘူးဆရာရယ်။ အဲ့လိုတွေမဖြစ်အောင် ဘယ်လိုတွေ ဆင်ခြင်နေထိုင်ရမလဲဆရာ။  

နောက်တစ်ခုက တအားလန့်တတ်တာ ဘာဖြစ်လို့လဲဆရာ။ လမ်းသွားနေရင်း ဒေါင့်ချိုးတစ်ခုက လူတစ်ယောက်ပေါ်လာရင်လဲ လန့်တာပဲ ဆရာ။ အဲ့လို လန့်သွားတဲ့အချိန်တွေဆို လူက ခွေကျသွားတော့မလားအောက်မေ့ရတယ်။ ကတုန်ကယင်တွေဖြစ်လာပြီးတော့ ဘေးက တစ်ခုခုကို ချက်ချင်းဖမ်းကိုင်ထားရင်ထား၊ ဘေးနံရံကို မှီထားရင်ထား အဲ့လိုလုပ်ရတယ်။ ရင်တွေတအားခုန်လာပြီးရင် ရင်ဘတ်ထဲမှာလဲ အောင့်သွားသလိုလိုခံစားရသေးတယ်ဆရာ။ ချက်ချင်းပဲ မောဟိုက်သွားသေးတယ်။ လန့်တတ်တာ ရောဂါလား။ အကျင့်ပါနေလို့လားဆရာ။ ဒါမှမဟုတ် သတိမရှိလို့လား။ အဲ့လိုမလန့်အောင်ရော ဘယ်လိုတွေဆင်ခြင်နေထိုင်ရမလဲဆရာ။ ဆရာ့ဆီက အကြံပြုချက်တွေ၊ ဆွေးနွေးချက်တွေနဲ့ ပြန်စာကို နန်းမျှော်နေပါတယ်။

မေတ္တာဖြင့်...

နန်း

လူ့ခန္ဓာကိုယ်မှာ လေဝင်ပြီး ထွက်တဲ့နေရာသုံးနေရာ ရှိတယ်။တခုကပါးစပ်။ စားသောက်တဲ့အခါ ဝင်လာတဲ့လေက အစာအိမ်နဲ့အူလမ်းကြောင်းရောက်တယ်။ ဝင်ပြီးတာနဲ့ အပေါ်(သို့)အောက်အပေါက်က ထွက်လိမ့်မယ်။ နောက်နေရာတခုက အဆုတ်ဖြစ်ပါတယ်။ လေကိုရှုသွင်းတဲ့အခါ နှာခေါင်းကတဆင့်လေပြွန်ထဲရောက် နောက်ဆုံးအဆုတ်မှာ ရှိတဲ့လေအိတ်(alveoli)ထဲ ဝင်ရောက်တယ်။ ဝင်သွားတဲ့လေကအောက်စီဂျင်ဖြစ်ပေမယ့် ပြန်ထွက်တဲ့လေကျတော့ ကာဗွန်ဒိုင်အောက်ဆိုက်ဖြစ်တယ်။ နောက်ဆုံးလေဝင်တဲ့ နေရာတခုက နားဖြစ်ပါတယ်။ နားဆိုတာ လေဝင်လေထွက်ဖို့ သဘာဝကပေးထားတဲ့ ပြတင်းပေါက်နဲ့ တင်စားကြတယ်။ လေထုဖိအားပြောင်းလဲမှုကို သူက ခံစားနိုင်တယ်။ တောင်တက်တောင်ဆင်း ကားစီး၊လေယာဉ်စီးတဲ့အခါမျိုးမှာ နားအူတာ၊ခေါင်းမူးတာတွေ ခံစားရတယ်။ အိမ်ပတ်ပြေးတဲ့အခါ ချာချာလည်မူးရင်လည်း အတူတူပဲ။ နားအတွင်းပိုင်းမှာ လေထုဖိအား ရုတ်တရက် ပြောင်းလဲမှုကြောင့် ဖြစ်ပါတယ်။  

ဒါပေမယ့် အခုဟာက စားပြီသောက်ပြီးလို့ ထွက်တဲ့လေမျိုး မဟုတ်ဘူး။ ခန္ဓာကိုယ်တနေရာရာ(ကုတ်၊ကျောပြင်၊ခြေထောက်)စတဲ့နေရာတွေကို နှိပ်လိုက်တိုင်း လေထွက်တာဖြစ်တယ်။ တမျိုးပြောရရင် အကြောတခုခုကို ထိလိုက်တိုင်း ခန္ဓာကိုယ်က ပြန်တုံ့ပြန်တဲ့သဘောမျိုးပါ။ ဘာမှ မထိရင်တော့ ဘာမှမဖြစ်ပါဘူး။ အများစုက အသက်(၆၀)ကျော် အဖိုး၊အဖွားအရွယ် တွေမှာ ဖြစ်တယ်။  ဇရာလက္ခဏာဆိုရင် မှန်သလိုလိုရှိပေမယ့် ကလေးတွေလည်း ရိ်ှပါတယ်။ ရှားတော့ရှားတာပေါ့။ ဒီလိုဖြစ်ကြတော့ လူ့သဘော ရောဂါများလားဆိုပြီး သွေးစစ်၊ဆီးစစ်၊ဓာတ်မှန်ရိုက်ကြတယ်။ အများစုက အကုန်ကောင်းပါတယ်။ ရောဂါကြောငိ့ မဟုတ်ရင်ဘာကြောင့်များလဲ တွေးစရာရှိလာပါပြီ။ 

ဘာ့ကြောင့် ဒီလိုဖြစ်ရလဲ

ဆေးကျောင်းသားတိုင်း ဒုတိယနှစ်ရောက်ရင် ခန္ဓာဗေဒ၊ဇီဝကမ္မနဲ့ ဇီဝဓာတုဆိုပြီး သင်ရပါတယ်။ ဇီဝကမ္မဆိုတာ ကိုယ်ခန္ဓာဇီဝဖြစ်စဉ်ပြောင်းလဲခြင်းကို လေ့လာရတာဖြစ်တယ်။ လူ့ခန္ဓာကိုယ်မှာ သိစိတ်မဲ့ အာရုံကြောလှုပ်ရှားမှုကို ဖြစ်စေတဲ့ စနစ်တွေထဲမှာ parasympatheticဆိုတဲ့ စနစ်တခု ရှိပါတယ်။ လူတယောက် အနားယူတဲ့အချိန်မှာ ဖြစ်ပေါ်တဲ့ ဇီဝပြောင်းလဲမှုကို ဒီစနစ်က ထိန်းချုပ်ပေးတယ်။ ဥပမာအားဖြင့် ကျွန်တော်တို့စိတ်ကမသိဘဲ အသက်ရှုနေတာ သူ့ကျေးဇူးပါ။ ထမင်းစားပြီး ထိုင်နေပေမယ့် ဗိုက်ထဲက အစာအိမ်လှုပ်ရှားအောင်၊အစားအစာ ချေဖျက်အောင် ဒီစနစ်က သူ့ဘာသာလုပ်ဆောင်ပေးနေတယ်။ ဒီစနစ်ကို ထိန်းချုပ်ပေးတဲ့ အာရုံခံဆဲလ်တွေက ဦးနှောက်နဲ့ ကျောရိုးဆစ်မကြီးက ထွက်လာတယ်။ အထူးသဖြင့် အပေါ်ဆုံး ဦးနှောက်ကထွက်လာတဲ့ cranial nerveနဲ့ အောက်ဆုံး မြှီးညောင့်ရိုးဆစ်ကထွက်လာတဲ့ sacral nerveက တွေက parasympathetic ပြောင်းလဲမှုကို ထိန်းချုပ်ပေးတယ်။ အဲဒီထဲမှာမှ ဦးနှောက်က ထွက်လာတဲ့ vagus nerve ဆိုတာ ခန္ဓာကိုယ်အတွက် အခရာကျတယ်။ သူ့ရဲ့ တာဝန်တွေက မသေးပါဘူး။ နှလုံးခုန်တာ၊အစာခြေတာ၊ချွေးထွက်တာ စတဲ့သိစိတ်မဲ့တုံ့ပြန်မှု မှန်သမျှကို ထ်ိန်းချုပ်ပေးတယ်။ လည်ချောင်း၊လည်မြိုမှာရှိတဲ့ ကြွက်သားတွေရဲ့ လှုပ်ရှားမှုကို ဖြစ်ပေါ်စေတာကြောင့် အသံထွက်တာ၊အသက်ရှုတာစတဲ့ဖြစ်စဉ်တွေပေါ် သက်ရောက်စေသတဲ့။ 

လူ့ခန္ဓာကိုယ်ကို နှိပ်တဲ့အခါ vagus nerveကို သွားရောက်လှုံ့ဆော်လို့ လည်ပင်းကြွက်သား၊အစာမြိုပြွန်တွေ သိစိတ်မဲ့လှုပ်ရှားလာပါတယ်။ အဲလို လှုပ်ရှားမှုတွေကနေ အသံတွေထွက်လာတယ်။ ဒါ့ကြောင့် ခန္ဓာကိုယ်ကို နှိပ်တဲ့အခါ တဂေ့ဂေ့နဲ့ လေထွက်တာ vagus nerveကြောင့်ပါ။ နှိပ်တဲ့အခါ သွေးကြော(မြန်မာလို လေကြောခေါ်မလား)ကို ဖိမိတဲ့အခါ သွေးလည်ပတ်မှုအားကောင်းလာတယ်။ ဒီလိုနည်းနဲ့ skeletal muscle ကြွက်သားတွေ ပြေလျှော့လာပြီး အကြောအခြင်တွေ၊အညောင်းအညာတွေ သက်သာစေတယ်။ အညောင်းအညာ ပြေပျောက်သွားပြီး နေလို့ထိုင်လို့ ပိုကောင်းလာတယ်။ လူနာကတော့ နှိပ်လိုက်လို့ လေတက်၊လေတက်လို့ အနေရခက်တာတွေ သက်သာသွားတယ်လို့ ထင်ပါတယ်။ ဒါ့ကြောင့် နှိပ်လိုက်တိုင်း လေတက်တာ စိုးရိမ်စရာမဟုတိပါဘူး။ ရောဂါလည်းမဟုတ်ပါဘူး။ တချို့တွေးသလို လေဖြတ်တာမျိုးလည်း မဖြစ်နိုင်ဘူး။ 

လန့်တာ ရောဂါတော့မဟုတ်ဘူး။ စိတ်အခြေခံကြောင့်ဖြစ်တယ်။ sympathic ခေါ်တဲ့ ခန္ဓာကိုယ်မသိစိတ်က တုံ့ပြန်မှုကြောင့်ပါ။ ကြောက်စိတ်ကဲတာဖြစ်တယ်။ ကြာလာရင် နှလုံးကို ထိခိုက်စေတယ်။ လန့်တတ်တာ မကောင်းဘူး။ ပြုပြင်ရမယ်။ ပြုပြင်တယ်ဆိုတာ စိတ်အခြေခံအကြောင်းကို ဆိုလိုချင်တာ။ သောက်ဆေးသောက်လဲ ယာယီဘဲရမယ်။ ကြာလာရင် ဆေးစွဲမယ်။ စိတ်ကိုပြောင်းလဲကြည့်ပါ။ သတိလေးထား၊တရားလေးမှတ်နိုင်ရင်မှတ်ပါ။ အစွဲမှန်သမျှ ပြေပျောက်အောင်ကြိုးစားပါ။ တချို့ကလည်း ကြိုးစားရင် ကောင်းလာတတ်တယ်။ စိတ်မလျှော့ပါနဲ့။

ဒေါက်တာ အေးမင်းထူး

၁.၁.၁၅